رێگای نێوان کفری – دووزخورماتوو دەکرێت بە دووساید

+964

سیروان خورشید – دوزخورماتوو

لە سەر داوای کۆمەڵێک چالاکوانی کفری و گەرمیان، حکومەتی عێراقی رێگای نێوان کفری – دووزخورماتوو دەکات بە دوو ساید.

رێگاکە کە لە کفریەوە دەست پێدەکات بۆ بازگەی سلێمان بەگ و بە قۆری چایی بەناوبانگە رۆژانە هاتوچۆیەکی زۆری لەسەرە بە تەواوبوونی کار ئاانی زۆر بۆ شۆفێران دەکات.

رێگاکە جگە لەوەی یەک سایدە قیرەکەشی بەتەواوەتی تێکچووە و چەندین بازگەی هێزە عێراقیەکانیشی تیادایە و ئاستەنگی هاتوچۆ زۆر دروستدەکات.

وەزارەتی ئاوەدانکردنەوە و نیشتەجێکردنی عێراق بە پێی نوسراوێک کە لە 2.10.2023 و بە ژمارە 19526 دەرچووە ئاماژەی بەوەکردووە کە قۆناغی رووپێوی تەواو بووە و ماوەتەوە دیزاین بکرێت و دەست بە جێبەجێکردنی بکرێت.

شوان جەلال سەرپەرشتیاری گروپی رێگا کە داوای بە دووسایدکردنی ئەو رێگایان کردبوو بە 964ـی وت، لەئێستادا قۆناغى رێگاکە گەشتووە بە ئامادەکردنى دیزاین و تەواوکردنى پێداویستییەکانى جێبەجێکردنی پرۆژەکە بەهەماهەنگى لەگەڵ فەرمانگەى رێگاوبان و پردەکانى پارێزگاى دیالە.

وتیشی، دەستپێکردنی پڕۆژەکە بە ئەگەری زۆرەوە لە سەرەتای ساڵی داهاتوەوە دەچێتە بواری جێبەجێکردنەوە و بەردەوام دەبن لە بەدواداچوون و چاودێریکردنی رێکارەکانی بە دووسایدکردنی رێگاکە.

پێداچوونەوە: توانا نەقی