چەمی وشکەڕوو لە دهۆک...فۆتۆ: +964
پرۆژه‌یه‌كی ستراتیژی له دهۆك وه‌ستاوه و مه‌ترسی بۆ خه‌ڵك هه‌یه
964+
عەمار عەزیز – دهۆك
كاركردن له پرۆژه‌ی چه‌می “هشكه‌ڕوو” له دهۆك ماوه‌ی زیاتری ده ساڵه وه‌ستاوه، كه ئاوی پیس و زێرابی ماڵان له شاره‌كه ده‌باته ده‌ره‌وه، ئه‌مه‌ش مه‌ترسی بۆ هاوڵاتیان دروست كردووه و سه‌رچاوه‌یه‌كه بۆ نه‌خۆشی، لایه‌نی په‌یوه‌ندیداریش وه‌ستانی پرۆژه‌كه بۆ نه‌بوونی پاره‌ی پێویست ده‌گه‌ڕێنێته‌وه.
پرۆژه‌كه درێژییه‌كه‌ی زیاتره له 15 كیلۆمه‌تر و له ناوه‌ندی شاری دهۆكه‌وه تا كۆتایی شاره‌كه ده‌ڕوات.
پرۆژه‌كه درێژییه‌كه‌ی زیاتره له 15 كیلۆمه‌تر و له ناوه‌ندی شاری دهۆكه‌وه تا كۆتایی شاره‌كه ده‌ڕوات.
964+ ده‌زانێت، لە سەردەمی تەمەر کۆچەری پارێزگای پێشووی دهۆک، پرۆژەکە درا بە کۆمپانیایەک و گوژمەی 90 ملیون دۆلاری بۆ تەرخان کرا، بەڵام تەنیا لە 11 % تەواو کرا، دوای ماوەیەکیش پرۆژەکە راگیرا، ئەمە لە کاتێکدایە ئەمساڵ 72 پرۆژە بە گوژمەی 37 ملیار و 840 ملیون دینار له شاره‌كه جێبەجێکراون.
عیسا گورگۆ موسا، ماڵەکەی دەکەوێتە سەر لێواری چەمی هشکەڕوو، ئه‌و به 964+ی وت: “چوار جار ئاوی چه‌مه‌كه هاتووەتە ناو ماڵه‌كه‌م، تەنیا خۆم و منداڵەکانم رزگارکردووە و هیچی دیكه‌مان بۆ نه‌ماوه‌ته‌وه، پردێک هەیە دوو سێ مەتر لە ئێمەوە دوورە، پێش ئەوەی دروست بکرێت ئاو نەدەهاتە ناو ماڵه‌كانمان، بەڵام کە پردەکە دروست کرا، ئیتر هەر جارێک باران زۆر ببارێت ئاو دێتە ناو ماڵه‌كانمان.”
وتیشی، “لە هاوین لەبەر بوونی ئاوی چه‌مه‌كه پشوومان نییه، منداڵەکانم تووشی نەخۆشی دەبن، پزیشکه‌كان دەڵێن بەهۆی بوونی ئاوی پیسی رووبارەکەیه، ئه‌مه جگه له‌وه‌ی هەموو کاتێک بۆنی ناخۆشی هه‌یه، هەر دەڵێن چاكی دەکەین و هیچ دیار نییە”.
ماجد سەید ساڵح، جێگری پارێزگاری دهۆک بۆ کاروباری تەکنیکی به 964+ی وت “کۆمەڵێک پرۆژە لە 2022 جێبەجێکراون، بەڵام پرۆژەی دروستکردنی چه‌می هشکەڕووی تێدا نەبوو، لە بەرنامەی حکومەتی هەرێم و پارێزگای دهۆکدایە دووبارە ئیش لەسەر چه‌می هشکەڕوو بکرێت، بەڵام ئەمە پەیوەستە بە باشبوونی دۆخی دارایی هەرێمی کوردستان”.
وتیشی”پرۆژەی هشەکەڕوو پرۆژەیەکی زۆر کونە ماوەیەک ئیشی لەسەر کرا، دواتر وەستا، ئەمەش بەهۆی قەیرانی دارایی و نەبوونی پارە بۆ پرۆژەکە، به‌ڵام بە دڵنیاییەوە لە بەرنامەماندایە پرۆژەکە تەواو بکه‌ین، چونکە بە یەکێک لە پڕۆژە ستراتیژییەکانی پارێزگای دهۆک دادەنرێت”.
ئیسماعیل مستەفا، بەرپرسی راگەیاندنی سەرۆکایەتی شارەوانیی دهۆک بە 964 وت، “ئەمساڵ به دوو قۆناغ بە پشتگیریی پارێزگای دهۆک رووبه‌ڕێكی به‌رفراوانی چه‌می هشكه‌ڕوومان خاوێن کرده‌وە، هەروەها بە درێژایی 500 مەتر دیواری گابیۆنیمان داناوە، بە تایبەت لەو شوێنانەی ئاوی رووبارەکە نزیکە لە ماڵان، تا لە کاتی لافاو زیانیان پێ نەگات”.
وتیشی، “لە قۆناغی دووەمدا به درێژایی شه‌ش كیلۆمه‌تر چه‌مه‌كه‌مان خاوێن كرده‌وه، ئێمە حەزده‌کەین پرۆژەکە دەستپێبکرێتەوە، چونکە بۆ ئێمەش ناخۆشه و قورسە هەموو ساڵێک خاوێن بکەینەوە، بەڵام پێویسته حکومەتی هەرێم بڕە پارەیەک تەرخان بکات بۆ دووبارە دروستکردنی دیواری کونکرێت”.