لە رانیە قارچک شەش کەسی ژەهراوی کرد

ژووری هەواڵ

لە رانیە، شەش کەس جۆرێک لە قارچکیان خواردووە کە شیاو نییە بۆ خواردن، بەوهۆیەوە هەر شەشیان ژەهراوی بوون و گەیەندراونەتە نەخۆشخانە.

ئەمڕۆ چوارشەممە 27.12.2023، فەرمان ئەحمەد، بەڕێوەبەری کارگێڕی نەخۆشخانەی رانیە بە 964ـی وت، بەهۆی خواردنی قارچکەوە شەش کەس باری تەندروستیان تێکچووە و ژەهراوی بوون و براونەتە نەخۆشخانەکە و تا ئێستا یەک کەسیان لە نەخۆشخانە ماوە، “ئەوانی دیکەش لەسەر بەرپرسیاریەتی خۆیان رۆشتوونەتەوە”.

“نەخۆشەکان توشی سکچوون و رشانەوە بوون و چارەسەری پێویستیان بۆ کراوە و باری تەندروستیان جێگیرە”، نەخۆشخانەکە وا دەڵێت.

بەوتەی بەڕێوەبەری نەخۆشخانەکە، ئەو کەسانەی ژەهراوی بوون، قارچکەکەیان لە چەند ناوچەیەک لە دەوروبەری رانیە هێناوە و خواردویانە.

لە جیهاندا 14 هەزار جۆری قارچک هەیە، لە دارستان و دەشت و شاخ و تەنانەت بنی دەریاکانیشدا دەردێن و دەژین، بەشێکی قارچكه‌كان دەخورێن و زۆر بەسوودن و بەشێکیشی تاڕادەی مردن ژەهراویین.