گەڕانەوەی ئاوارەکان لە دهۆکەوە بۆ ناوچەکانیان. وێنە: وەزارەتی کۆچ و کۆچبەرانی عێراق.
بە هەرزان پێیاندەدرێت
100 دۆنم زەوی دەکرێتە خانوو بۆ ئاوارەکانی موسڵ و شنگال
964+
ژووری هەواڵ
وەزارەتی کۆچ و کۆچبەرانی عێراق رەزامەندی پارێزگاری نەینەوای وەرگرت بۆ دابینکردنی ژمارەیەک پارچە زەوی لە شنگال و موسڵ بۆ ئەوە بەکاربهێندرێت بۆ دروستکردنی خانوو بۆ ئەو ئاوارانەی کە دەگەڕێنەوە زێدی خۆیان.
رووبەری زەوییەکان 100 دۆنمن، 50 دۆنمیان لە قەزای شنگالە و 50 دۆنمەکەی دیکە لە شاری موسڵە.
بەگوێرەی راگەیەندراوێکی وەزارەتی کۆچ و کۆچبەرانی عێراق، ئەو خانوانەی کە دروستدەکرێن بە نرخی هەرزان دەدرێن بە ئاوارەکان و وەک هاندانێکە تا بگەڕێنەوە زێدی خۆیان.
ئەمڕۆ چوارشەممە 10.1.2024، پیردەیان جەعفەر، بەڕێوەبەری کۆچ و کوچبەرانی پارێزگای دهۆک بە 964ـى وت، لەبارەی ئەو ئاوارانەی کەمپی دهۆک کە خەڵکی شنگال و بەشێک لە ناوچەکانی دیکەی عێراقن، “هیچ بڕیارێکیان پێنەگەیشتووە کە خانویان بۆ دروستدەکرێت”.
به‌پێی ئه‌و ئاماره‌ى كه 964 له كۆچ و په‌نابه‌رانى دهۆك ده‌ستیكه‌وتووه، لە سنوورى پارێزگای دهۆک 110 هەزار پەنابەری رۆژئاوای کوردستان لە ناو کەمپەکان و دەرەوەی کەمپەکان دەژین و 15 کەمپی ئاوارەی شنگالیش هه‌ن کە زیاتر لە 135 هەزار کەسى لێ نیشتەجێیە.