یەکێک لەو فڕۆکانەی هێڵی ئاسمانی عێراق لەگەشتەکانیدا بەکاریدەهێنێت _ وێنە: وەزارەتی گواستنەوە
باران و بای بەهێز هۆکار بووە
فرۆکەیەکی هێڵی ئاسمانی عێراقی نەیتوانی لە سلێمانی بنیشێتەوە
964+
ئەحمەد مستەفا
گەشتێکی فرۆکەخانەی نێودەوڵەتی بەغدا بۆ سلێمانی کە بڕیار بوو ئەمشەو کاتژمێر 9:30 خولەک ئەنجامبدرێ بەهۆی دۆخی کەشوهەوا هەڵوەشێندرایەوە و فرۆکەی هێڵی ئاسمانی نەیتوانی لە فڕۆکەخانەکە بنیشێتەوە.
رەنا روفەیعی، ئەندامی تیمی راگەیاندنی هێڵی فرۆکەوانی عێراقی بە 964ی وت، بەهۆی گۆرانی کەشوهەوا و دۆخی باران بارین و بای بەهێز، گەشتی ژمارە IA919 لە فرۆكەخانەی بەغدا وە بۆ فرۆکەخانەی نێودەوڵەتی سلێمانی هەڵوەشێندرایەوە و ئەو فڕۆکەی فڕیوە نەیتوانیوە بنیشێتەوە.
ئەو وتی، بە راگەیەندراوێک کەمێک پێش ئێستا داوای لێبوردنمان لە گەشتیارەکان کردووە و سەرەڕای ئەوەی تکتەکانیان نافەوتێ، هیچ مافێکی داراییان ناکەوێتە ئەستۆ، بەڵکو هەوڵەکان بۆ ئەوەن، لە نزیکترین کات، کەشوهەوا جێگیری بەخۆوە بینی گەشتەکە ئەنجامبدرێ و گەشتیارەکان بگەنە سلێمانی.
لەلایەکی دیکەوە، هەندرێن هیوا موفتی، بەڕێوەبەری فڕۆکەخانەی نێودەوڵەتی سلێمانی بە 964ی وت، بەهۆی ئەو بارانە بەهێز و هەورە تریشقەی لەسەر ئاسمانی سلێمانی هەبووە، تەنیا ئەو گەشتە ئەمشەو لەنێوان بەغدا بۆ سلێمانی هەڵوەشێندراوەتەوە و گەشتەکانی دیکە لە کاتی خۆیدا ئەنجامدەدرێن.
لە لیستی هاتووانی ئەمشەوی فرۆکەخانەی نێودەوڵەتی سلێمانی پێنج گەشت هەن، لە (عەممان، دوبەی، دۆحە، بەغدا و مەدینە) وە بۆ شارەکە، بەڵام فرۆکەخانەکە هاتنی گەشتی لە بەغداوە بە دواخراو نوسیووە.