پردی رێگای مەرزی سەیرانبەن دەردەکەوێت کە بەشێکی زۆری داڕوخاوە _ وێنە: 964
ساغکردنەوە
بەهۆی رووخانی پردەکەی رێگای مەرزی سەیرانبەن هاتووچۆی بازرگانی ناوەستێنێت
964+
کامیار کەمال – پێنجوێن
شەوی رابردوو بەهۆی بارانی بەهێز و لافاوەوە بەشێک لەو پردی دەکەوێتە سەر رێگای مەرزی سەیرانبەن لە نزیک گوندی ماسییەر داڕووخا، 964 سۆراغی کردووە، هاتووچۆی بازرگانی و هاوڵاتییان ناوەستێت ئاسایی دەبێت.
ئەمیر سۆفی جەمال بەڕێوەبەری بەشی پاراستن و چاککردنی رێگاوبانی پێنجوێن بە 964ی راگەیاند، بەشێکی پردەکە رووخاوە و بەشێکی کەمی دیکەی پردەکە مەترسی رووخانی لەسەرە، بەڵام هاتووچۆ و جموجوڵی بازرگانی ئاساییە و رێگای هیچ گوندێکیش نەگیراوە.
ئەو بەڕێوەبەرە ئەوەش دەڵێت، “سبەینێ تیمەکانیان دووبارە دەچنەوە سەر پردەکە و بەشێوەیەکی کاتی چارەسەری دەکەن، ئێستا نیوەی پردەکە واتا یەک سایدی ماوە و لەو سایدەی دیکەشدا کە رووخاوە، بەرلە گەیشتن بە پردەکە بەردیان داناوە وەک ئاگادارییەک بۆ هاوڵاتیان”.
چەند مانگێک دەبێت بەڕێوەبەرایەتی پاراستن و چاککردنی رێگاوبانی پێنجوێن دەرخستەیان بۆ چاککردنی پردەکە کردووە و لە وەزارەتی داراییە، بەڵام تا ئێستا هیچ وەڵامێکی نییە، ئەمە وتەی ئەمیر سۆفی جەمالە.
مەرزی نێودەوڵەتی سەیرانبەن، لەرۆژی 3.6.2022 بەفەرمی بووە بە مەرزێکی نێودەوڵەتی و هاتوچۆی بازرگانی و گەشتیاری تێدا دەکرێت، دووەم مەرزی نێودەوڵەتییە لە قەزای پێنجوێن لە دوای مەرزی نێودەوڵەتی باشماخ، شاری بانە لە رۆژهەڵاتی کوردستان دەبەستێتەوە بە قەزای پێنجوێن.