بەفربارین لە رێگاى مەرزى کێلێ وێنە: ئەرشیفى 964+
بەیانى دەکرێتەوە؟
رەشەبا مەرزى کێلێى داخستووە
964+
وریا فەتاح
بەهۆى ئەو رەشەبا بەهێز و سەرماوسۆڵەى سنوورەکەى گرتووەتەوە، ئەمڕۆ مەرزى کێلێ بە رووى گەشتیاران و هاتوچۆى بازرگانیدا داخرا.
جەوهەر رەسوڵ، بەڕێوەبەرى گومرگى راپەڕین بە 964ـى وت، “داخستنى مەرزەکە بەهۆى ئەو سەرماوسۆڵە و رەشەبا بەهێزەیە، کە سنوورى مەرزەکەى گرتووەتەوە، هەرچەندە ئێمە ئەمڕۆ ئامادەبووین، بەڵام لە دیوى ئێرانەوە مەرزەکە داخرا و هاتوچۆ تێیدا وەستا”.
باسى لەوەش کرد، کارمەندانى ئێران دەرگاکانیان داخستوون، ئەوەش بەهۆى ئەوەى ناتوانن پشکنین بۆ ئۆتۆمبێلەکان بکەن و رەشەبا بەفرەکەى بەرەو گۆڕەپانى مەرزەکە راکێشاوە.
لە بارەى ئەوەى سبەینێ مەرزەکە بە رووى هاتوچۆى بازرگانى و گەشتیاراندا دەکرێتەوە، جەوهەر رەسوڵ وتى، “جارێ نازانین، ئەگەر رەشەباکە ئاوا بەهێز بێت، زەحمەتە بتوانین مەرزەکە بکەینەوە، تەنانەت پەیوەندیمان بە دیوى ئێرانیشەوە کردووە و ئەوانیش وتوویانە ئەگەر دۆخەکە ئاوابێت، ناتوانین کار بکەین”.
مەرزی کێلێ دەکەوێتە باکوری رۆژھەڵاتی قەزای پشدەر لە دەڤەری راپەڕین و لەودیوەشەوە لە سنووری شاری سەردەشتە لە رۆژهەڵاتی کوردستان و رۆژئاوای ئێران.