بە سپاگێتى و سلیکۆن
خوێندکارانى زانکۆى گەرمیان 14 پرد دروست دەکەن
964+
میلاد جەلال- گەرمیان
لە پێشبڕکێیەکدا خوێندکارانى بەشى ئەندازیارى شارستانى گەرمیان، 14 پردیان بە سپاگێتى سلیکۆن دروستکرد.
لیا سەڵاح، خوێندکارى بەشى ئەندازیارى شارستانى گەرمیان لە بارەى پێشبڕکێکە بە 964ـى وت،”بە مادەى سپاگێتى و سلیکۆن، پێشبڕکێیەکمان ئەنجامدا کە 14 گروپ تێیدا بەشدار بووین و هەر گروپێک پێویست بوو بەو دوو مادەیە پردێک دروست بکات کە کێشەکەى لە دوو کیلۆ زیاتر نەبێت و درێژیەکەى لە یەک مەتر و 10 سانتیمەتر زیاتر نەبێت”.
بە بۆچونى لیا سەڵاح، تاقیکردنەوە لە رێگەى سلیکۆن و سپاگێتى هەنگاوێکى نوێیە، نەیان ویستووە بە کۆنکرێت پێشبڕکێکە ئەنجام بدەن، وەکخۆى دەڵێت: کۆنکرێت رێگەیەکى کۆنە.
یەکێک لە پردەکان توانى پلەى یەکەم بەدەست بهێنێت کە زیاتر لە 20 کیلۆ گرامى پێوە هەڵواسراو بەرگەى گرت و نەشکا.
پێداچوونەوە – وریا فەتاح