حه‌وت كرێكار له باڵه‌خانه‌یه‌كی شه‌قڵاوه كه‌وتنه خواره‌وه
میدیازان – دیسکی هەولێر
نیوه‌ڕۆی ئه‌مڕۆ به‌هۆی داڕمانی باڵه‌خانه‌یه‌كی 15 نهۆمییه‌وه له‌شه‌قڵاوه، حه‌وت كرێكار كه‌وتنه خواره‌وه‌و یه‌كێكیان گیانی له‌ده‌ستدا.
موحسین قەسرۆكەیی بەڕێوەبەری راگەیاندن و پەیوەندییەكانی نەخۆشخانەی شەقڵاوە بە میدیازانی ڕاگەیاند كە نیوەڕۆی ئەمڕۆ لەكاتی كاركردندا لە باڵەخانەیەكی پانزە نهۆمیدا و بەهۆی داڕمانیەوە شەش كرێكار برینداربوون و دانەیەكی دیكەش بەناوی (محەمەد عەزیز) تەمەن (24) ساڵ خەڵكی دەشتی هەریر گیانی لەدەستدا.
بەڕێوەبەری راگەیاندن و پەیوەندییەكانی نەخۆشخانەی شەقڵاوە ئەوەشی راِگەیاند كە دوو لە كرێكارەكان برینەكانیان سەختەو لەئێستادا لە ژێر چارەسەر و چاودێری پزیشكدان.