هەشتا هونەرمەندی کوردو عەرەب لەسلێمانی پێکەوە

میدیازان – دیلان محەممەد و هێڤی خالید – سلێمانی

لە سلێمانی پێشانگایەکی هونەری شێوەکاری، هونەرمەندانی کورد و عەرەبی لە چوار وڵات کۆکردەوە.

زیاتر لە ٨٠ هونەرمەندی شێوەکار لە وڵاتانی سووریا، عێراق، میسر، تونس و بەشێک لە هونەرمەندانی کوردستان بەشدار بوون، تابلۆ و کارە هونەرییەکانیان بردە ئەمنە سوورەکەی سلێمانی و بۆ ماوەی دوو کاتژمێر کارەکانیان نمایش کرد.

“زیاتر لە ٨٠ هونەرمەندی شێوەکار لە وڵاتانی سووریا، عێراق، میسر، تونس و بەشێک لە هونەرمەندانی کوردستان بەشدار بوون“

سەرچڵ شەوقی، سەرپەرشتیاری پێشانگاکە بە میدیازانی راگەیاند، “ئامانج لە پێشانگای هونەرمەندانی عێراقی و وڵاتانیی عەرەبی و هونەرمەندانی کورد ئاشنابوونی هونەرمەندانی وڵاتانی دیکەیە بە کلتوری کورد و ئاڵگۆڕ کردنی بیربۆچوونی هونەری.”

وتیشی، “کارە هونەریەکانی هەر هونەرمەندێک گوزارشت لە کلتوری وڵاتەکانیان دەکات”.

پێشانگاکە رۆژی ٥ شەممە لەلایەن “دەزگای حوادسی هونەری” رێکخرابوو و شەشەم پێشانگای هاوشێوەیە کە دەزگاکە تا ئێستا لە عێراق رێکیانخستووە.

عەلی روباعی لە شاری بەغدادەوە بەشداری لە پێشنگاکە کردووە، ئەو بە میدیازانی وت، سلێمانی جێگەیەکی تایبەتە بۆ هونەرمەندان و خەڵكیکی زۆر هاتوون بۆ بینینی پێشانگاکە.

“کارە هونەریەکانی هەر هونەرمەندێک گوزارشت لە کلتوری وڵاتەکانیان دەکات”

گۆنا سلێمان هونەرمەندێکی شاری سلێمانییە، دەڵێت، ”لەگەڵ برایان وخوشکانی بەغداد و بەسرە و شارەکانی عێراق بە چەندین ئاست بەشداری تێدا کراوە، بەشداریکردن لەگەڵ کلتوری نوێ جیاوازە بۆمان.”