هێشتا هۆکارەکەی نەزانراوە
لە دینارتە لە چوار رۆژدا 400 کەس تووشی سکچوون و رشانەوە بوونە
964+
عەمار عەزیز – دهۆک
لە سنووری ناحیەی دینارتە 400 کەس لە چوار رۆژدا تووشی سکچوون و رشانەوە بوون، بەڵام تائێستا تەندروستی شارەکە هۆکارەکەی نازانێت.
بەڕێوەبەرایەتی تەندروستی دینارتە لیژنەیەکی 10 کەسی پێکهێناوە و نموونەیان لە ئاوی ناحیەکە وەرگرتووە، بەڵام تا ئێستا هۆکاری ئەو حاڵەتەیان رانەگەیاندووە.
ناحیەی دینارتە سەر بە قەزای ئاکرێیە لە پارێزگای دهۆک.
سەربەست سەبری، بەڕێوەبەری ناحیەی دینارتە بە توڕی 964ـی راگەیاند: پێشتر ئەو حاڵەتانە لە ئاکرێ و دهۆکیش تۆمار کراون، بەڵام بەو رێژە زۆرە نەبووە کە لە دینارتە هەیە.
حاڵەتەکان لەرۆژی پێنجشەممەی رابردوو 23ـی ئەم مانگە دەرکەوتوون.
تۆڕی964 دەزانێت، حاڵەتەکان قورس نین و نەخۆشەکان بە وەرگرتنی “مغەزی” و هەندێ دەرمان چاک دەبنەوە و هیچ نەخۆشێکیش رەوانەی دەرەوەی ناحیەکە نەکراوە.
بەڕێوەبەرایەتی تەندروستی دینارتە ئامادە نەبوون لێدوان بدەن “تا ئەنجامی پشکنینەکانمان دەرنەچێت لێدوان لەوبارەیەوە نادەین”.
پێداچوونەوە: پێشەوا محەمەد