خورماڵ خۆی بۆ بوون بە قەزا ئامادە کردووە

964+

محەمەد عومەر- هەڵەبجە

بەرپرسانی ناحیەی خورماڵ هەوڵەکانیان بۆ بە قەزاکردن چڕکردۆتەوە و لە رێگای پارێزگاری هەڵەبجەوە داواکارییەکەیان گەیاندۆتە ئەنجومەنی وەزیران و چاوەڕێی وەڵامن.

فەرەیدون مەحمود، بەڕێوەبەری ناحیەی خورماڵ بە 964ی راگەیاند، خورماڵ هەموو مەرجێکی تێدایە بۆ ئەوەی ببێت بە قەزا و ئەگەر ئەمە جێبەجێبکرێت خزمەتگوزاری زیاتری بۆ دابین دەکرێت.

خورماڵییەکان چاوەڕوانی وەڵامی ئەنجومەنی وەزیرانن

“لە چەند رۆژی رابردودا کۆبوونەوەیەکی گرنگمان لەگەڵ پارێزگاری هەڵەبجە و بەڕێوەبەرانی ناحیەکەمان ئەنجامدا لەبارەی بەقەزاکردنی ناحیەکە، پارێزگاری هەڵەبجە خۆی بە مەیدانی هاتۆتە سەرخەت و داواکاریەکەمان گەیشتوەتە ئەنجومەنی وەزیران کە بکرێت بە قەزا لەسەر ئیدارەی پارێزگای هەڵەبجە” فەرەیدون مەحمود وای وت.

ناحیەی خوڕمال، سەر بە پارێزگای هەڵەبجەیە و ژمارەی دانیشتووانەکەی زیاتر لە 25 هەزار کەسە و لە سنووری ناحیەکەدا 47 گوندی ئاوەدان هەیە.

بە وتەی بەڕێوەبەری ناحیەی خورماڵ، پێشتر لەلایەن حکومەتی عێراقەوە داواکراوە کە قەزایەک بخرێتە سەر پارێزگای هەڵەبجە.

پێداچوونەوە: هاوبەش ئەبوبەکر