“چەند مۆتێل و ڤێلای بچووك هەیە بۆ كرێ بەڵام هۆتێلی گەورەی تێدانییە”
لە هەورامان هۆتێل نییە
964+
كوردستان ئەحمەد – هەولێر
لە دەڤەری هەورامان هیچ هۆتێلێكی گەورەی لێ نییە، تەنیا چەند مۆتێل و خانوێكی تێدایە كە كراون بە هۆتێل و مۆتێل بۆ كرێ.
دەڤەری هەورامان لە خورماڵەوە دەستپێدەكات تا دەگات بە تەوێڵە، لە هەڵەبجەشەوە لە گوندی خەرپانێوە دەستپێدەكات تا دەگاتە تەوێڵە، پێكدێت لە ناحەی خورماڵ و تەوێلە و بیارە، لەگەڵ چەندین گوند و ناوچەی گەشتیاری، وەك سەرچاوەی زەڵم و سەیرانگای مێشڵێ و چەند ناوچەیەكی دیكە.
گەشتیارە ناوخۆییەكانی هەرێمی كوردستان سەردانی سەیرانگای ئەحمەد ئاوا و تەوێڵە و بیارە دەكەن، بەڵام گەشتیارانی ناوچەكانی خوارووی عێراق زیاتر سەردانی سەرچاوەی زەڵم دەكەن.
یەكێك لە كێشەكانی دەڤەری هەورامان ئەوەیە كە هۆتێل و مۆتێلی گەورەی تێدانییە بۆ مانەوەی گەشتیاران، بۆیە ناچارن بگەڕێنەوە بۆ شارەكانی دیكەی وەك سلێمانی و هەڵەبجە.
هەندێك خانوو نۆژەنكراونەتەوە و كراون بە شوێنی مانەوەی شەوان بەڵام زۆر نین و بێ خزمەتگوزارین.
هەورامان جەلال، وتەبێژی گەشتوگوزاری هەڵەبجە بە 964ی وت، لە تەوێڵە هۆتێلێكی زۆر جوان دروستكراوە بەناوی هۆتێل جەواهێر، بەڵام تەواو نەكراوە، لە بیارە و زەڵمیش بەنیازن دروستی بكەن.
ساڵانە زیاتر لە دوو ملیۆن گەشتیاری ناوخۆ و شارەکانی ناوەڕاست و باشووری عێراق سەردانی دەڤەری هەورامان و ناوچە شاخاویەكانی ئەو ناوچەیە دەكەن.