لە گەرمیان 16 پارچە تەقەمەنی چارەسەر کران

964+

هاوبەش ئەبوبەکر

لە سێ ناوچەی گەرمیان، 16 پارچە تەقەمەنی ببون بە مەترسی بۆ سەر ژیانی هاوڵاتیان، ئەمڕۆ بە شێوەیەکی زانستی هەڵگیرانەوە و بۆ لەناوبردن گوێزرانەوە بۆ شوێنێکی دوور لە ئاوەدانی.

بەڕێوەبەرایەتیی کاروباری مین، ئەمڕۆ چوارشەممە لە فەیسبووک رایگەیاند، سەردانی  قەزای کفری، ناحیەی قۆرەتوو و گوندی حەوش کوڕووی کردووە، بە مەبەستی هەڵگرتن و گواستنەوەی ژمارەیەک پارچە تەقەمەنی جۆراوجۆر بۆ شوێنی مەبەست.

تەقەمەنییەکان 16 پارچە بوون، دانەیەکیان مووشەکە و 15 دانەکەی دیکە پێکهاتوون لە گولە تۆپ و هاوەن و دوو پارچە تەقەمەنی.

شوێنی تەقەمەنییەکان، لەلایەن رێکخراوی کارکردن لە پێناو ئاشتی ئاشکرا کراوە و لۆکەیشنەکانیان دراوە بە تیمی لە ناوبردنی تەقەمەنی (EOD) بە مەبەستی لەناوبردن.