میلكان شوێنێكی كلتوری بۆ لە باوشگردنی ڕۆشنبیرانی خانەقین

+964

راژان ماجد – خانەقین

قاوەخانەی میلكان لە خانەقین، دەبێتە ماڵۆچکەیەک بۆ کۆکردنەوەی ئەدیب و رۆشنبیران و رۆژنامەنووسانی شارەکەو ناوچەکە، هاوکات چینوتوێژەکانی دیکەی كۆمەڵگاش رووی تێدەکەن.

قاوەخانەکە ئەمساڵ کراوەتەوە، بەڵام دیزاین و بیرۆکەکەی مێژووی کولتوورو رۆشنبیری و ئەدەبی سەدان ساڵەی خانەقینی لەخۆیەوە کۆکردووەتەوە.

شاری خانەقین، لەدێر زەمانەوە دەیان شاعیر و ئەدیب و هونەرمەند و كەسانی بەهرەمەند لە بوارە جیاجیاكاندا تێدا هەڵکەوتووە و، تا ئەمڕۆش بووەتە زەمینەیەكی بە پیت بۆ دەركەوتنی بەهرە و تواناكانی گەنجەکانی.

ئەمیر خانەقینی، خاوەن قاوەخانەی میلكان دەڵێت؛ بیرۆكەی كردنەوەی ئەم قاوەخانەیە ئەمساڵ هاتە كایەوەو ئامانجی سەرەكیش بۆ كۆكردنەوەی رۆشنبیران و ئەدیبان و رۆژنامەنووسان بووە، تا ببێتە ماڵۆچکەو سەکۆیەک بۆیان، یان مەڵبەندێك تاوەکو لەیەكەوە نزیكیان بكات، بۆیە بیرۆکەکە پێش ئەوەی لایەنی قازانج و دەستکەوتی مادی بێت، ئەوا کۆکردنەوەی رۆشنبیرانی دەڤەرەکەیە.

میلکان، بەشیوە زاری کەلهووڕی بەمانای زێدی باوباپیران دێت، ئەمەش رەنگدانەوەی لەسەر قاوەخانەکە داناوە کە ژوورەوەی قاوەخانەکە لێوان لێوە لە وێنەی کۆنی خانەقین و دەیان کاری دەستی ناسراوی ناوچەکە، هەر شوێنێکی قاوەخانەکە سەیر بکەی شوێن پەنجەیەكی زەقی رۆشنبیرانی دەڤەرەکەی بەسەرەوەیە، لەوانە ئامێری عود، كتێبی سیاسی و هونەری و کولتووری و دیوانی شاعیران، هەروەها هەڵواسینی شیعرە رەسەنەكانی كەلهووڕییەکان، هەموو ئەو تابلۆیانە پێكەوە باسی چیرۆكی شارێكی گەورە لەتەمەن و شارستانیت دەكەن كە ناوی خانەقینە.

پێشتر خانەقینییەکان، بۆ كۆبوونەوە و نزیكبوونەوەیان لەیەكتر لە شوێنی جیاجیا کۆبوونەتەوە، هەندێكجار لە رۆخی رووباری ئەڵوەن و هەندێجاریش لە شەقامی كرندی کە یەکێکە لە شەقامە بەناوبانگەکانی شارەکە کە دوو هەزار ساڵ پێش ئێستا لەلایەن مەلیک قەیسی ساسانییەکانەوە دروستکراوە، بەڵام ئێستا قاوەخانەی میلكان بەم شێوازە كولتووریەی توانیویەتی سەرجەم چینوتوێژەكانی كۆمەڵگا لە خۆ بگرێت.

عەباس ئەركەوازی، بەڕێوەبەری رۆشنبیری و هونەری خانەقین دەڵێت؛ میلكان بووەتە جێی بایەخی سەرجەم رۆشنبیرانی شارەكە و ئێمەش وەكو لایەنی حكومی بەردەوام كۆڕو كۆبوونەوەكانمان لەم شوێنانە ئەنجام دەدەین بە هۆی ئەوەی نزیكە لە رۆحیەتی زیندووی هونەریی شارەكە.