964+
هێمن بەکر – هەولێر
لە شەوی رابردووەوە تەم و مژێکی چڕ ناو شاری هەولێر و دەوروبەری گرتووەتەوە، وتەبێژی هاتوچۆ دەڵێت، هیچ رووداوێکی هاتوچۆ بەهۆیەوە رووینەداوە.
تەم و مژەکە بە جۆرێک بوو، کە ئاستی بینین لە شەودا کەمتر لە ١٠٠ مەتر بوو، لە بەرەبەیانیشدا تاوەکو ٣٠٠ مەتر بوو.
964+ دەزانێت لە پارێزگاکانی دهۆک و سلێمانی و هەڵەبجەش تەم و مژی چڕ هەبووە.
هەر دوێنێ شەممە، بەڕێوەبەرایەتی هاتوچۆی هەولێر هەشت رێنمایی بۆ شۆفێران بڵاوکردەوە، تاوەکو بتوانن بە سەلامەتی لەو تەم و مژەدا شۆفێری بکەن.
داگیرساندنی گڵۆپەکانی تەم و کەمکردنەوەی خێرایی و هێشتنەوەی مەودا لەنێوان ئۆتۆمبێلەکان بەشێک بوون لە رێنماییەکانی هاتوچۆی هەولێر.
ئەمڕۆ دووشەممە، 964+ پەیوەندی کرد بە فازڵ حاجی، وتەبێژی هاتوچۆی هەولێر، ئەو وتی، “خۆشبەختانە لە شەوی رابردوو تاوەکو ئێستا، هیچ رووداوێکی هاتوچۆ بەهۆی تەم و مژەوە رووینەداوە”.
پێشتر و لە تشرینی یەکەم، کاتێک بۆ یەکەمجار باران لە ئەمساڵدا باری، نزیکەی ٣٠ رووداوی هاتوچۆ روویاندا لە ماوەی چەند کاتژمێرێکدا، کە زۆربەیان بەهۆی خلیسکانەوە بوو.
بەگوێرەی پێشبینییەکانی کەشناسی هەرێمی کوردستان، کەش و هەوای ئەمڕۆ دووشەممە، ئاسمان نیمچەهەور دەبێت و لە کاتەکانی ئێوارەدا دەگۆڕێت بۆ هەوری تەواو.
