بەشێک لە هاوڵاتیانی هەرێم لە سەرەی وەرگرتنی بەنزیندا. وێنە/فەرمانگەی میدیا و زانیاری حکومەتی هەرێم
حکومەت: لیترێک نەوت بۆ عێراق ٤٥٠ و بۆ هەرێم ٧٥٠ دینارە
964+
هاوبەش ئەبوبەکر – سلێمانی
حکومەتی عێراق لیترێک نەوتی سپی بە ٤٥٠ دینار دەدات بە ھاوڵاتیانی ناوەڕاست و باشووری عێراق، بەڵام بە ٧٥٠ دینار بۆ ھاوڵاتیانی ھەرێمی دابین دەکات، وتەبێژی حکومەتی هەرێم وا دەڵێت.
ئەمڕۆ لە کۆنفرانسێکی هەواڵیدا لە هەولێر، جوتیار عادل وتەبێژی حکومەتی هەرێمی کوردستان رایگەیاند، “چەندین جار بەڵێنیان دابوو نەوتمان بۆ بنێرن بە نرخێکی زۆر گرانتر، واتا ئەگەر لیترێک نەوتی سپی لەسەر هاوڵاتی عێراقی لە دەرەوەی هەرێم ٤٥٠ دینار بکەوێت ئەوا لەسەر هاوڵاتییانی هەرێم ٧٥٠ دیناریان دیاریکردووە، واتە نزیکەی دوو هێندە.”
وتیشی، “دەبێت هاوڵاتیانی هەرێمی کوردستان بزانن کە چۆن حکومەتی عێراقی مامەڵەیان لەگەڵدا دەکات.”
بە وتەی جوتیار عادل، حکومەتی هەرێم ساڵی رابردوو نزیکەی نۆ ملیار دیناری داوە بە حکومەتی عێراق بۆ دابینکردنی نەوت، بەڵام “نە نەوتەکەیان ناردووە و نە پارەکەشیان گەڕاندووەتەوە.”
بەپێی دوایین ئاماری حکومەتی هەرێمی کوردستان، تاوەکو ئێستا ١٦٩ هەزار و ٩١٩ خێزان لە پرۆسەی دابەشکردنی نەوتی سپی سوودمەندبوون و پرۆسەکەش بەردەوام دەبێت.
حکومەتی هەرێمی کوردستان دەڵێت، بڕی ٧٠ ملیار دینار بۆ کڕینی نەوتی سپی تەرخانکردووە و پاڵپشتیی حکومەت بۆ نرخی هەر بەرمیلێک دەگاتە ٦٥% و هاوڵاتیان تەنیا لە ٣٥% نرخەکەی دەدەن.