گۆڕانکاری لە نرخی نەوت روویدا

964+

فەهمی نەبی

ئەمڕۆ شەممە لە کاتی کردنەوەی بۆرسەی جیهانی، نرخی نەوت ژمارەیەکی پێوانەیی تۆمار کرد و هەر بەرمیلێک نەوتی برێنت 84 دۆلار و 54 سەنتە.

تۆمارکردنی ئەو نرخە نوێیە لە کاتێکدایە، دوێنێ هەینی بۆرسەی نەوت بە 83 دۆلار و 79 سەنت داخراوە، بەمەش ئەمڕۆ بۆ هەر بەرمیلێک نەوتی برێنت 71 سەنت بەرزتر بووەتەوە.

بە گوێرەی داتاکان، سێ مانگ زیاترە نرخی نەوت ئەوەندە بەرز نەبووە، کۆتا جار رۆژی 18ـی ئایاری ئەمساڵ بووە لەو نرخەدا بیندراوە.

نرخی نەوتی سووکی تێکساس ئەمڕۆ شەممە، 80 دۆلار و 67 سەنتە و نرخی دوێنی 80 دۆلار و نۆ سەنت بووە.

بەرزبوونەوەی نرخی نەوت لە کاتێکدایە، لە رۆژی چواری حوزەیران ئەندامانی رێکخراوی ئۆپیک رێککەوتن لەسەر کەمکردنەوەی هەناردەکردنی نەوت بۆ بازاڕەکانی جیهان، سعودیە یەکێک لە گەورە وڵاتانی هەناردەکردنی نەوت رایگەیاندبوو ئەوان رۆژانە یەک ملیۆن بەرمیل کەمدەکەنەوە.

لە سەرەتای مانگی نیسانی ئەمساڵ، وەزارەتی نەوتی عێراق بڕیاری دا لە سەرەتای مانگی ئایار 211 هەزار بەرمیل نەوت کەم بکاتەوە ئەمەش لە پێناو سەقامگیریی نرخی نەوت لە بازاڕی جیهاندا.