عێراق لە پاڵەوانیەتی عەرەب سەرکەوتنێک و دوو شکستی تۆمارکرد

964+

یادگار محەمەد – سلێمانی

لە پاڵەوانیەتی تۆپی سەرمێزی وڵاتانی عەرەب، هەڵبژاردەی عێراق لە یارییەکدا سەرکەوتنی بەدەستهێنا و رووبەڕووی دوو شکستیش بووەوە.

لەژێر چاودێری فیدراسیۆنی تۆپی سەرمێزی عەرەب و لە هۆڵی کۆلێژی پەروەردەی جەستەیی زانکۆی سلێمانی، پاڵەوانیەتییەکە بە بەشداری 11 هەڵبژاردە دەستی پێکرد.

هەردە رەئوف سەرۆکی فیدراسیۆنی عێراق بە 964ـی راگەیاند، دوای هەوڵێکی زۆر توانیان ئەو پاڵەوانیەتییە گرنگە بهێننە شاری سلێمانی کە پێشتریش دوو پاڵەوانیەتی گەورەی تر لەم شارەدا ئەنجامدرابوو.

هەڵبژاردەکان لە شاری سلێمانی هەست بە ئارامی و خۆشییەکی زۆر دەکەن و سەرسامن بە شێوازی رێکخستنی پاڵەوانیەتییەکە و شوێنی حەوانەوە و جێگە گەشتیارییەکانی شارەکەیان زۆر بەدڵە، هەردە رەئوف وای وت.

لە ئەنجامی دەستپێکی پاڵەوانیەتییەکەدا و لە کۆمەڵەی تازەپێگەیشتوانی کوڕانی ژێر تەمەن 15 ساڵ دوو یاری بەڕێوەچوو.

عێراق – قەتەر 0 – 3
تونس – ئەردەن 3 – 1

لە کۆمەڵەی یەکەمی بێچووەشێرانی کوڕانی تەمەن 13 ساڵ.
جەزائیر – قەتەر 3 – 1
لوبنان – ئەردەن 3 – 1

لە کۆمەڵەی دووەمی هەمان ئاست.
عێراق – بەحرەین 3 – 2
میسر – سعودیە 3 – 0

لەسەر ئاستی کچانی تەمەن خوار 13 ساڵ.
عێراق – تونس 0 – 3
ئەردەن – لوبنان 3 – 1

پاڵەوانیەتییەکە ماوەی هەفتەیەک بەردەوام دەبێت و رکابەرییەکانیش لە دوو کاتی جیاوازدا بەڕێوەدەچن.

پێداچوونەوە: توانا نەقی