![دوای ١٧ ساڵ بوونە خاوەنی یەکەم منداڵ](https://ku.964media.com/storage/2022/12/IMG_20221212_134801_169.jpg)
هێرش حەسەن منداڵەکەی لەباوش گرتووە. وێنە/964+
دوای ١٧ ساڵ بوونە خاوەنی یەکەم منداڵ
964+
مەجید بتوێنی – رانیە
ژن و مێردێک لە قەزای حاجیاوا دوای ١٧ ساڵ و ١١ مانگ، لە نەخۆشخانەی ژنان و منداڵبوونی رانیە بە نەشتەرگەری یەکەم منداڵیان لەدایکبوو.
هێرش حەسەن باوکی منداڵەکە بە 964+ی وت، منداڵەکە کچە و ناویان ناوە مێرگوڵ، هەمان ناوی داپیرەیان لێناوە.
هێرش حەسەن دەڵێت لە خۆشیدا، زیاتر لە ٦٠ کەس لە ئەندامانی خێزانەکەی چوونەتە نەخۆشخانەی ژنان و منداڵبوونی رانیە و لە دەرەوە چاوەڕێی لەدایکبوونی مێرگوڵ بوون.
باوکی مێرگوڵ دەڵێت، دوای چاوەڕوانیەکی زۆر و سەردانی چاندان پزیشکی تایبەت بەڵام سوودی نەبوو، بەڵام لەدوای مانگی رەمەزانەوە رۆژێک خێزانەکەی تەندروستی تێکدەچێت و سەردانی پزیشک دەکەن، دوای پشکنین بۆیان دەردەکەوێت هاوسەرەکەی دوو گیانە و سکەکەی لە رەگەزی مێیە.
“تەندروستی منداڵەکە و دایکیشی زۆر باشە، زۆر دڵخۆشین کە رەگەزی کچە و جیاوازی نییە لەنێوان کوڕ و کچ،” هێرش حەسەن وای وت.
پێشتریش لە مانگی ١٠ لە قەڵادزێ ژن و پیاوێک دوای ١٥ ساڵ چاوەڕوانی بوونە خاوەن یەکەم منداڵیان.
ساڵی رابردووش هەر لە قەڵادزێ ژن و پیاوێک دوای ٢٤ ساڵ لە هاوسەرگیری بوونە دایک و باوک و منداڵێکیان بوو.